Hitzek badute zer esana
OSASUN MENTALAREN GAINEAN KOMUNIKATZEKO ESTILO-GIDA
Inork ez luke errudun sentitu behar nahasmendu mentala izateagatik. Eta badaude itxaropena berreskuratzeko moduak. Hori da etengabe eta etsi gabe egin behar dugun ahalegina eta gaur zuekin hartzen dugun konpromisoa.
Eskerrik asko zuen istorioa eskaini diguzuenoi. Eskerrik asko herritar guztiek aukera bat dutela sentitu dezaten nola edo hala laguntzen duzuen erakundeei, elkarteei eta administrazioei”.
(2018ko urriaren 9an Osasun Mentalaren Munduko Eguna ospatzeko Diputatuen Kongresuan egin zen ekitaldian Letizia erreginak emandako hitzaldia)
`HITZEK BADUTE ZER ESANA´
Urteetan zehar, osasun mentaleko arazoak dituzten pertsonak eta haien senideak zein ingurunea estigmaren zamarekin bizi izan dira. Zama pisutsua benetan, estereotipo eta aurreiritzi faltsuz betea, gizarteratzeko, suspertzeko edota eskubideak berreskuratzeko pauso handiak ematea galarazi diena. Hedabideen rola garrantzitsua eta erabakigarria da oso estigma hori hausteko. Hitz egokiak erabiltzea, osasun mentalaren zaintza sustatzen duen informazio positiboa eskaintzea, irudien bitartez estigmatizazioa saihestea, datu kontrastatuak ematea edo nahasmendu mentala duten pertsonei haien istorioak kontatzen uztea dira zama hori behin betiko arintzen lagundu dezaketen hainbat neurri. Gida honen helburua da, osasun mentalarekin lotutako gaien edo alderdien gainean informatzean, kazetariei hizkuntza egokiagoa erabiltzeko datuak eta gakoak eskaintzea.
